2

Huil saam my kind

Ek soek vanoggend vir my 13 jarige dogter. Ek roep en roep na haar. Ek begin wonder of sy wegkruip. Dis hoe min lus is sy om te kom werk. Ek raak frustreerd. Die hele week moet ek roep en dreig en skel: Kom doen jou werk!!

En gister was sy geniepsig en nors met haar jonger sus. Ek het lank met haar gesels en probeer vasstel wat pla. Sy het nie veel geantwoord nie. Net dat hulle ‘annoying’ is. Ek sê vir haar sy moenie haar gevoelens opkrop nie. Sy mag vir my sê wanneer iets haar onstel.

Ek vra haar toe om koek te bak vir ons bediende. Sy het al voorheen die sjokolade mikrogolf koek gebak. Maar die keer flop dit. Sy voel teleurgesteld. Ek sê sy mag weer een bak. Ons sal die flop eet. Maar die volgende koek het ook een kant plat geval en snaaks gelyk. Ek sê dis dalk die bakpoeier wat oud is. Sy is naby trane. Sy tree baie kwaad op en storm weg. Ek begin dink die hormone pla.

Vanoggend, toe die sussies vra om eers te gaan stap voor skool, sê ek dis reg! Die buitelug sal hulle goed doen. Hulle kom vrolik terug en ons spring aan die werk. Maar Janéy is weer MIA. Ek roep en roep en soek haar.

Sy kom uiteindelik maar sukkel deur wiskunde. Elke som is vir haar erg moeilik. Sy vergeet basiese maaltafels en kan nie lang deel doen nie. Dinge wat ek 2 jaar gelede vir haar geleer het is net skoonveld. Ek doen my bes om nie uit te bars nie. Lelike gedagtes van haar IK begin deur my kop opkom. Ek byt op my tong. En toe bars haar damwal.

Sy ruk van die huil. My hart versag en ek hou haar vas. Sy huil my skouer nat. En begin stukkend vir my sê hoe sy sukkel. Hoe sy niks kan onthou nie. Hoe sy dinge nie kan verwoord soos haar jonger sussie nie. Sy sê sy stap saam Ilani en Ilani vertel als wat sy in ‘n video gekyk het. Sy klink so slim en kan als onthou. Vir Janéy is die woorde nie daar nie. Sy kan nie terugvertel wat sy geleer het nie. Sy kan skaars onthou wat sy geleer het. Sy voel dom. Toe verstaan ek hoekoms sy so stry met haar sussie. Sy voel minderwaardig teenoor haar. Sy kan sien dat Ilani duidelik presteer in areas waarin sy self baie sukkel.

Ek begin saam huil. Ek voel haar moedeloosheid en het nie dadelik antwoorde nie. Ek voel haar pyn en deel die angs. Ek hou haar vas en ons huil net saam.

En toe kom die woorde na my. Hoe goed is sy met haar tweeling sussas. Hoe kalm bly sy wanneer hulle tantrum gooi. Hoe net sy weet wat Nivea weer sal laat bedaar. Ek sê vir haar dat dit nie Ilani se talent is nie. Sy sê altyd iets wat die jongste juis kwaad maak. So, het elkeen sterk eienskappe en goed waarmee hulle sukkel. Dit het haar laat beter voel.

Maar dit was nie totdat ek laat sy die Nessy, Understanding Dyslexia kursus doen nie, dat sy regtig beter oor haarself begin voel het. Die kursus was klomp videos wat met animasie mooi uitbeeld hoe werk iemand met disleksie se brein. Dit het gewys hoe hulle sukkel met kort-termyn geheue en ouditiewe prosessering. Julle moes die lig in haar oë en die verligting beleef toe sy vir my kyk na die videos. “So dis hoe my brein werk!” En dis nie net sy nie. Sy kom agter BAIE mense se breine werk so. Hoekom anders sou hulle die videoreeks gemaak het?! Daars ‘n groot las van haar skouers af: sy is nie dom nie. Haar brein is net anderste bedraad.

Daar was dinge waarmee sy nie gesukkel het nie. Soos skryf. Haar handskrif is baie netjies. En ‘spacial awareness’. Sy kan haar kamer netjies organiseer – geniet dit eintlik baie! So, nie als op die disleksie lys, was van toepassing op haar nie. Sy kom agter dat daar ‘n glyskaal is, dat sommige mense meer sukkel as ander. Dat haar disleksie nie ‘n baie erge graad is nie.

Daar was ook strategieë om daarmee te deel. Baie breke. Herhaling. En ander wat ek weer sal moet besoek. Die Nessy kursus was ook goed vir my om te doen, saam Janéy. Nou kan ek meer geduld met haar hê. Om jou vinger op ‘n probleem te sit, is nie ‘n slegte negatiewe ding nie. Ja, dit maak seer om te druk daarop, maar dit bring verligting om aandag daaraan te gee. Om dit te identifiseer en n naam te gee.

Daarom, is ek van opinie dat kinders hulle diagnosis moet ken. Ek weet nie wanneer is die beste tyd om sulke goed met jou kind te deel nie. Seker elke situasie en omstandighede gaan vra dat gesinne dit sagkens en met wysheid benader. Ek kan net deel watse vrug en sonskyn het dit vir my dogter gebring.

Ek het begin dink ek was verkeerd. Dat sy nie disleksie het nie. So ek het aangegaan en haar gedruk om soos haar portuurgroep te vorder. Ek het gevoel sy moet harder werk en wonder hoekom snap sy nie die Wiskunde nie. Sy het onsteld gevoel. Sy kon die verskil tussen haar en haar suster agterkom. Dit het begin eet aan haar. Dit het haar kwaad en hartseer gemaak. Wat as sy haarself begin haat het?

Hierdie was in Februarie van 2021. Dis nou paar maande later. Dit gaan baie goed met Janéy. Sy kan nie vir ons sê wat sy in haar Spaanse lesse leer nie. Dit wil nie na vore kom as sy saam my in die kar huis toe ry nie. Maar toe sy daar was, het die woorde gevloei. Sy sê sy het slim gevoel. Sy het haar Juffrou verstaan en kon saampraat. So ek glimlag breed en sê ek is so trots op haar!

Ek het Wiskunde boeke (Maths Gaps van McMillian) gekoop wat by Graad 4 wiskunde begin en in die selfde dun boek vorentoe werk tot Graad 6 werk. Nou, sukkel sy nie met Graad 7 Wiskunde nie, sy vlieg deur Graad 4 Wiskunde. Sy lag dat sy al hierdie goed vergeet het. En doen 6 bladsye na mekaar. Sy blom met self-vertroue.

Sy weet waar lê haar kragte. In kinderoppassing en organisering. Sy maak lyste en hou kop van hulle besigheid. Sy skep sisteme met plakkers wat beteken wat met die produkte moet gebeur. Ek is beïndruk! Ons prys haar vir al die goed! En sy voel goed!

Om jou kind te help beteken soms om hulle bewus te maak van hulle diagnosis. Hulle swakhede staar hulle elke dag in die gesig. Hulle kan sien hoe is hulle anders. Hulle vergelyk hulleself met familie en mense op televisie elke dag. As hulle weet dat wat hulle mee worstel ‘n naam het en baie algemeen is, kan dit baie vrede bring. Baie gerusstelling! Hulle is nie weird of freaks of foutief nie. Net anders. En dis ‘n goeie ding!

0

Lui Dae

Daar is baie flukse tuisskool mammas!

Die wat dou voor dag opstaan en werk inpas voor die kinders wakker word. Ek dink aan boervrouens op die plaas wat die koei gemelk het en botter gemaal en brood gebak het voor die kinders kom sit vir ontbyt! Ek dink aan Rista wat saam haar man 4uur opstaan en sy kosblik pak en hom afsien werk toe terwyl dit buite nog donker is. Ek haal my hoed af vir die Supervrouens!

Ek is nie so mens nie. Ek het vanoggend tot 7:50 geslaap! Meskien haal ek nog slaap in van my kinders se babajare. Nie een het deur geslaap voor 2 jaar oud nie. Ek het elke aand telkemaal opgestaan. Ek slaap steeds nie deur nie, maar 2 wakker kere is vir my baie goed in vergelyking met 15 of meer kere opstaan.

Wat ookal die rede, ek begin sommige dae, vir al in die winter, baie stadig. En wat van Tuisskool? Elke dag hier by ons lyk anderste. Laas Donderdag het ek so lui gevoel. Dit was koud en ek het ‘n vuur aangesteek in die kaggel. Toe lees ek vir die kinders uit die pragtige boek: Joan of Arc. Dit is uitstekend geïllustreer en die woorde werk goed saam om haar storie akkuraat uit te beeld. Ek en my dogters was nogal opgesweep in haar saga. My tweeling is 5 en hulle het in ‘n fort gespeel wat die ouer sussies vir hulle gebou het in die sitkamer by ons voete. Ons is snoesig saam op die bank. Die passie en ywer van Joan d’Arc roer mens se binnestes. En toe sy doodbrand by die vuurstapel, eggo die woorde van die soldate, Jesus se eie soldate: ‘sekerlik het ons nou ‘n vrou van God doodgemaak’.

My enigste opdrag aan die kinders daardie dag, was om een van haar aanhalings mooi oor te skryf. Elkeen het iets anders gekies. Ek het Quotes of Joan of Arc geGoogle en my oudste het een van daardie gekies. Sommige het meer kuns inkorporeer as ander, maar die aanhaling was daar, en daarmee was die dag ook klaar.

En nou is dit weer Donderdag en ek staan laat op en wonder wat ons vandag gaan doen. 9uur het nog niemand ontbyt geëet nie, so toe begin ek deeg maak vir scones. As die brood klaar is, bak ek dikwels plaatkoekies of scones want EK hou van die eetgoed. Ek roep my 5 girls en ons klits room en dek die tafel vir tee!

Ek lees ook vir hulle humoristiese gediggies van Jaco Jakobs se boek: ‘Ek wil nou nie snaaks wees nie’. Die tweeling sê hulle wil ‘n gediggie leer, so ek stuur hulle met Ilani (11) om ‘n kort een te gaan leer. Janéy (13) bring haar wiskunde na my toe en ons pluis dit saam uit. Toe my 5 jariges vir ons ‘Krap in my neus’ kom opsê het, wys ek vir die kinders uit hoe die een woord verskillend verstaan kan word. ‘Krap’ kan ‘n werkwoord wees, soos die diere dit verstaan het, of ‘n selfstandige naamwoord – ‘n letterlike krap. Die spelling van die woord bly dieselfde!

Ilani voel toe geïnspireer en begin werk aan haar eie gedig. Sy vra oor rymwoorde en ons gesels oor die ritme van ‘n gedig. Wat doen Tenike (8) al die tyd? Sy gebruik my waterverf (waarvoor sy raas gekry het) en skilder ‘n prent!

So, my punt is hopelik vanselfsprekend. Lui dae is lekker! Dit lok gesprekke en kuns uit. Dit gee mens ‘n algemene gevoel van tevredenheid en welstand. V’middag ry ons rond na ballet en drama en winkels, maar ek sit nog in pantoffels en japon! 😊

3

Wag met skool

As jy nie ‘n keuse het nie; jy moet werk, daarom gaan jou kind skooltjie toe, is hierdie artikel nie vir jou nie. Ek verstaan dat met vandag se ekonomie, is ‘n een-inkomste huisgesin raar en ‘n groot voorreg. So, ek is nie hier om werkende mammas te laat skuldig voel nie. Dankie vir julle harde werk en bydra! Ons waardeer julle!

Ek praat met mammas wat druk voel vanaf die samelewing om hulle peuters en kleuters in die skool te sit. Ek praat met ouers wie oorweeg om hulle voorskoolse kindertjies te ‘tuisskool’. (Dis nie amptelik tuisskool nie, want die wet vereis eers dat kinders op 7 jaar in die skool moet wees. So voor 7, hoef jy NIEMAND se permissie te hê om jou kind tuis te hou nie.) Maar ons noem dit al tuisskool, want dit word al hoe meer abnormaal om voorskool kinders tuis te hê. Dis reeds baie op neergekyk!

Daar is baie druk op kleuter mammas om hulle kinders in die skool te sit. Sjoe! Ek lees op Bakkiesblad van ‘n ma van’ n 1-jarige wie se gesin haar druk om terug te gaan werk toe. Haar seun moet skooltjie toe gaan volgens hulle. Om maatjies te maak! Jinne ouens! 1 jaar oud! Hulle speel nie met maatjies op daardie ouderdom nie! Lyk dalk vir jou so maar dis parallel speel. Om langs ‘n ander kind te speel is nie sosialisering nie! Shame! Ek hoop die mamma geniet nog haar kindjie tuis vir so lank soos moontlik!

Ander mamma voel druk om haar 5 en 3-jarige seuntjies skool toe stuur. Terwyl sy ‘n pragtige kleuterskool geskep het by hulle huis! Maar kinders moet skool toe om maats te maak en te leer en voor te berei vir groot skool, dis wat ons vertel word.

Ek wil iets radikaals sê: ander kinders sit meer stres op’ n kind in sy vormingsjare as wat dit voordelig is!

Hoekom voel ouers hulle is nie genoeg vir hulle kinders nie? Is mamma alleen nie wat ‘n jong kindjie nodig het nie? Die een ma met wie ek gesels het, moes hoor dat haar seuntjies ook bietjie tyd weg van haar nodig het. Wow! Dis ‘n nuwe siening. Dr James Dobson sal stry. Sy boeke sê, kinders speel parallel tot 4 jaar oud. Dat 6-jariges deur ‘n tweede skeidingsangs gaan wat baie normaal is. Die jaar wat kinders Graad 1 toe gaan, is biologies ook die jaar wat hulle skeidingangs beleef! Arme kinders. Hier is navorsing daaroor as jy meer oor dit wil oplees.

‘Maar kinders moet leer deel en hulle beurt wag en vaardighede wat hulle net by ‘n skool gaan leer’, skree die pro-skool kant. Teen 4 jaar, het meeste kinders ‘n boetie of sussie met wie hulle hulle mamma, hulle kamer en hulle speelgoed moet deel. Daar leer hulle van geduld en onselfsugtig wees. In die veiligheid en bekendheid van hulle eie huis.

Dink aan jou werksomgewing. Daar is vriende en ‘buddies’ maar ook mense wie jou warm onder die kraag maak. Jy kan nie hulle vermy nie want hulle is elke dag daar in julle kantoor. So, jy hanteer opmerkings en sluk kwaad woorde elke dag. Dit skaaf aan jou en jy voel geïrriteerd en kwaad maar kan nie elke dag iets terug sê of skree wat jy sou wou nie. Jy probeer net deur die dag kom, sonder om jou koel te verloor.

Kinders beleef dit ook! En hulle emosies is meer intens en moeilik om te beheer. Daardie kind kyk hulle snaaks aan. Daai een vat haar pop. Juffrou sê sy moet kom storie luister maar sy wil nog eintlik klaar speel waar sy was. Daar is heeltyd ‘n getrek en stamp aan haar, fiesies maar ook emotioneel.

Die kleuters moet badkamer toe gaan wanneer hulle nie wil nie, hulle verf of klei wegpak wanneer Juffrou sê dis tyd; hulle moet in kom van buite af wanneer vir hulle voorgeskryf word. Nie wanneer hulle kies nie. As die sand of die wind hulle pla, wie kan hulle daarvan vertel? Dis nie ‘belangrik’ genoeg om vir een van die volwassenes daar te sê dat hy nie sy beertjie by die huis kon vind nie. So die kind loop rond met die bekommerde hartjie heeldag. En dan vra Juffie dat hy op een been staan so lank soos hy kan. Sy moet gou evalueer.

Hoe weet ek die goed? Want ek was ‘n kleuterskool juffrou gewees. Vir jare voor dit, ‘n assistent juffrou. Pragtige skool. Gawe Juffies. Speelplek wat kinders van kan droom. Ek het my als gegee. Die kinders drukkies en liefies gegee. Die lesse so prettig en interessant gemaak soos moontlik. Ek het gedramatiseer en stories uitgebeeld. Ons het liedjies gesing en speletjies gespeel. Maar ek kan die verskil sien tussen daardie kinders en my eie wat ek nou by die huis hou. Maak nie saak hoe oulik die plek is nie, dis nie tuis nie.

Ons het al gehoor dat kinders stouter is by hulle eie mammas as by ander mense of by die kleuterskool. Hoekom is dit? Want hulle kan ontspan en hulle self wees. Hulle kan tantrums gooi en mamma se aandag eis. Hulle kan kla en moan oor als wat pla. Wat doen hulle by die skool? Hulle hou dit in. Onderdruk daardie gevoelens en dit wat eintlik hulle onstel. Hoeveel ouers hoor hoe soet en goed gaan dit by die skool en dan slat die paw-paw die fan by die huis? Dis nie die ma se skuld nie, dis juis omdat daardie moë, oorgestimuleerde kind nou in hulle eie omgewing is waar hulle mag voel en wees en uithak. Onvoorwaardelike liefde maak dit moontlik. Als wat deur die dag opgebou het, loop nou oor. Al die onderdrukte emosies, borrel op eenslag oor. Hou hulle vas mammas. Sê jy kan sien hulle het ‘n rowwe dag gehad. Sjoe, hulle is baie onsteld. So baie gevoelens ~ dis moeilik om te verwoord wat hulle als pla. Hulle kan nog nie vir jou vertel van die honderde klein goedjies wat hulle deur die loop van die dag onstel het nie.

So, as jy kan mamma of pappa, hou jou kind by die huis. Waar hulle kan slaap tot hulle uitgerus is. Waar hulle rustig self kan aantrek en daardie knopie self vasmaak. Waar hulle saam jou plaatkoekies kan maak en kies wat hulle daarop sit. By die huis kan hulle self besluit waarmee hulle wil speel en hoe lank hulle daarmee wil speel. En toilet toe gaan wanneer hulle blaas vir hulle sê dis nodig. En glipsies maak sonder om skaam te voel. En op mammas se skoot klim wanneer hulle die behoefte kry. En net mamma se mooi, gawe gesig sien. Nie klomp vreemdelinge nie.

Ek sê vir mammas wie se familie hulle slegsê omdat hulle tuisbly met hulle kleuters, “HOU SO AAN!” Jy doen goed! Jou kinders weet nie om vir julle dankie te sê nie, so ek sê vir julle dankie! En vir die pappas wat hulle vrouens ondersteun en voorsien sodat hulle kan tuisbly: DANKIE!! Julle is helde!

Mamma, jy is die heel beste persoon vir jou kind. Jy is sy wêreld! En dis hoe dit hoort!

0

Maal Idees

Speletjies moet deel wees van leer, voel ek. Ek soek die lekkerste maniere om iets te leer. Oor die laaste ses jaar, het ek baaaaie metodes, webwerwe, boeke en prettige idees probeer om maaltafels vir my kinders te leer. Hier is ‘n lysie van hulle.

Begin by die begin. Leer eers in 2’e tel.

Ek gebruik ‘n dier speelding om te hop oor die ongelyke getalle. Die tier tel in 2’e.

Ek skryf met bordkryt op ons teëls 1 tot 20 sodat my dogter moet hop oor een teel en besef sy ‘skip’ elke tweede nommer. Sy spring van 0 tot 2 en van 2 tot 4 tot 6. Dit help die aanleer van die rympie, 2 4 6 8 10. Groot motoriese beweegings saam met die rympie help die brein dit onthou. En dis groot pret! 😄

Maar dit verduidelik nie wat maal is nie. Kinders moet groepies van goeters maak en dan tel. So ons het lekkers gebruik. Jelly tots of Astros of enige lekkertjies. Vanuit die bondel, groepeer twee twee sweeties saam. Dus kan die kind sien, nou tel mens hoeveel lekkers daar is, maar vinniger as een vir een. 2 4 6 8 10.

Tel in 3’e met lekkers

Eetbare Maaltafels

Jy kan ook krale, blokkies, rosyntjies, albasters, klippies, enig iets, gebruik om te groepeer. Oaties op ‘n sosatie stok of spaghetti is eetbare groepering. My voorbeeld is van sommetjies maar natuurlik kan mens dit in groepies van 2 of 3 ook maak en dan tel 2’e of 3’e.

Ons gebruik baie ons vingers vir maaltafels leer. Hier is die 9 maaltafel Vinger Metode! So helpvol! https://www.facebook.com/watch/?v=401957140396036

Nog lekker maalsomme.

Kompetisie Speletjies

Ek het al so baie speletjies met my kinders gespeel om hulle te help om die maaltafels te leer. So baie! Hier is een waar ek die antwoorde op stukkies lap geskryf het met ‘n merker. Die lap om teddiebere en sagtediertjies vasgemaak het. En dan die kinders hul maaltafels gevra. 7×7, 3×9, 7×8 ens, en dan moes hulle vinnig soek vir die beertjie met die antwoord. Twee sussies beteken ook kompetisie! So die eerste een om die antwoord te vind, wen! Later, bodder hulle nie om die speelding op te tel nie, hulle trap sommer daarop! Arme teddie!

Ander kompetisie speletjie was weer buite op die stoep. Twee sussies staan langs mekaar en ek staan 10 teëls weg van hulle af. Ek roep uit maalsomme: 2×8 is ? Eerste een om reg te skree, kan een teël vorentoe spring. Hulle was baie na aan mekaar. Dan kry Ilani een reg, dan is Janéy vinnigste. Eerste een by my wen! Dit was baie pret!

Kaart speletjie: 24

Kodes

Kodes is ‘n unieke manier om maaltafels te leer. Daars’ n spioen wat in ons almal skuil. So gebruik kodes om maaltafels vars te hou. Hier is twee voorbeelde:

Elke sweetie verteenwoordig ‘n nommer. Maal twee lekkers saam is dan dieselfde as om sekere nommers saam te maal. Selle met die plaasdiertjie speelgoed.

Melkbottel doppies

Ek het vir weke, (wel meskien net een week, want melk gaan vinnig in ons huis) melkdoppies en die skroefie waaraan hulle vasgedraai was afgehaal van die leë melkbokse. Julle het seker hierdie al op Pinterest of daardie oulike videos gesien. Dis baie moeite maar dit hou vir ewig. So nou kan die kinders dit doppies afskroef en daar lê die antwoord onder. Daarom was wit plakkers nodig. Ons het die name tag plakkers vanaf Pappa se kantoor gekry. Dit gebruik ek nogals gereeld vir tuisskool dinge. En dan die polystyreen weggooi bordjie. (Verskoon my Engels asseblief, ek ken nie al die mooi Afrikaanse terme vir die goed nie.)

My dramtiese kind. Sy sê sy wil nie hê dat die videos boring moet wees nie. 🙈😜

Speletjies

Ek het baie gebruik gemaak van speletjies wat ek aanlyn gevind het of in hierdie boek deur Peggy Kaye.

Peggy sê: Children throw themselves into playing games the way they never throw themselves into filling out workbook pages.

Daar is ook speletjies om te koop by Teachers pay Teachers. Ek het maaltafel speletjies soos hierdie afgelaai daar. Volg die skakel om dit self aan te koop. Of soek vir gratis speletjies op dieselfde webblad.

Nog ‘n speletjie was legkaart maaltafels. Ek knip en lamineer twee halwe van ‘n legkaart en steek hulle in die huis weg. Weer, kompeteer my meisies om so vinnig as moontlik die legkaart stukke te vind en dan te bou. Eerste klaar wen. Skakel vir die legkaart maalsomme is https://lifeovercsstore.com/products/multiplication-fact-puzzles-for-multiples-of-1-10

Rympies en Stories

Nog ‘n manier om maaltafels te leer is deur rympies en stories. Times Tales is’ n gewilde webwerf met stories vir elke maalfeit. En dit rym. Dis wel Engelse stories. Maar die prinsiep kan vertaal word na Afrikaans. Elke nommer het ‘n karakter.’ four’ is ‘n ‘door’, five ‘n hive en so word die stories gebou rondom die nommer karakters. Meskien moet ek bietjie dink aan Afrikaanse stories. 🤔’Maal Verhaal’ of ‘Malle Maaltafels’. Mens moet betaal vir Times Tales, maar as jy iets soortgelyks soek, heeltemal gratis, gaan kyk by https://www.multiplication.com/learn/learn-multiplication-facts

Janéy sê twee maal rympies op met beweegings.

Skootboek (Lapbook)

Janéy het ook ‘n maaltafel skootboek gemaak. Kunstige manier om al die maalfeite in klein boekies te sit binne in’ n plakkaat lêr. Dus knip en plak en gom sy die mini-boekies aanmekaar en leer hopelik die maaltafels soos sy dit doen. Ons het nog die skootboek iewers. Laai dit gratis af by https://www.homeschoolshare.com/multiplication_facts.html.php

Minecraft Multiplication

Vir die van julle wie se kinders ook Minecraft mal is, laai die speletjie af. Dit kombineer maaltafels en Minecraft! Dis ‘n bordspeletjie! Gratis, druk uit, knip uit en speel! https://royalbaloo.com/minecraft-multiplication-game/

Maal Apie

Ons het die maal apie apperaat aangekoop by Jolene Marshall 084 257 8790 vir slegs R250! Video van hoe dit werk is https://www.facebook.com/watch/?v=506765276933712

Tabel

Janéy het die tabel gemaak in 2018, toe sy 10 jaar oud was. Mens sit jou vinger op die dwars rye en die vertikale kolom en dan waar jou vingers ontmoet, is die antwoord. Dis ‘n wonderlike hulpmiddel vir wanneer die kind ander wiskunde doen en hulle maaltafels nog nie ken nie. Dan kyk hulle op die tabel. So 4×2, kind sit vinger op enige 4 bo en 2 aan die linkerkant. Volg die kolom met die vingers tot hulle ontmoet by 8.

Ek sou dit self netjieser kon doen of die uitgedrukte een gebruik. Maar Janéy het hierdie self gemaak, sodat sy dit meer geniet om te gebruik.

Toeps (Apps)

Soek vir Times Table games in die Play Store op jou foon. Ook onder Multiplication games is daar nog. Apps wat vandag se kinders se aandag behou en iets leer! My tipe toeps!

Dink julle sal saam stem dat ons baie kreatief was oor die jare en regtig hard gewerk het aan maaltafels. So ken my kinders hulle maaltafels? Nee! Steeds nie! Ek sug soveel keer terwyl ek hierdie blog post tik. Om te dink dat al hierdie buite-die-boks maniere nog nie my kinders gehelp het om hul tafels te ken nie! Ek dink my fout was om dit nie in te oefen nie. Ons sou een dag die aktiwiteit doen. Die speletjie een keer speel vir die video. Als net een keer op ‘n dag tussen weke van ander werk. Ek is nie konsekwent nie. Ek raak verveeld om die selle goed elke dag te vra. Of ongeduldig dat hulle steeds nie die selle maaltafel kan onthou nie! Ek het dan dit uit my kop geken teen… Kan nie onthou hoe oud was ek nie. Kan onthou hoe my pa my gevra het. Gereeld, oor en oor, voor bed tyd. Dink ek was 12 gewees.

Repetisie. Dis wat ek mis!

Liewe leser, hier is die oulike idees vir julle. Watookal julle doen, doen dit gereeld. Elke dag. En mag julle meer sukses behaal as ek!

0

Wat doen my Graad 7 dogter die jaar? (2021)

Sy moes haar eie doelwitte opstel. En ek help kies watse boeke en kursusse haar sal help om haar doelwitte te bereik.

Ek probeer nie vaskyk in haar een spelfout nie, het dit nie eers vir haar genoem nie. 🙂



Wiskunde: steeds Graad 6 Simply Maths met die plan om so gou moontlik Graad 7 boek toe te gaan. Maar sy sukkel met wiskunde so ons vat dit stadig.



Afrikaans: hierdie pragtige IGSCE Tweede-taal Afrikaans boeke tweedehands gekoop op Homeschool Exchange South Africa (New and 2nd hand educational material)

Ek weet nie of sy Cambridge roete gaan loop nie, maar ek hou van hierdie boek en werk en dink dis nou presies reg vir Janéy.



Engels: Writer’s in Residence vanaf https://cumbooks.co.za/products/gr-4-8-writers-in-residence-vol-1-apprentice-spiral-bound

Janéy hou van skryf, so ek wil haar help ontwikkel daarmee.



Bybel: Proverbs People vanaf https://oikosstore.co.za/product/proverbs-people-book-1/#:~:text=’Proverbs%20People’%20are%20character%20workbooks,children%20of%20around%205%2D10.



Aardrykskunde saam my Wêreldlande aanbieding wat sy as assistent werk met my met my kontak klasse. Lees meer oor hoe julle kan deel kan wees al bly julle nie naby nie. https://kieswetterklaskamer.wordpress.com/whatsapp-klub/



Sy stel belang in Onderwys en droom van Au Pair en met kleuters werk. So ek het haar ingeskryf vir kollege-vlak kursus: Childcare and Early Learning Diploma (baie bo haar vuurmaakplek so ek moet saam lees en verduidelik wat dit beteken maar dis okay. Sy sal daarin groei!) https://www.centreofexcellence.com/shop/childcare-early-learning-diploma-course/



So ek vra haar gereeld om lessies met my tweeling te doen en dan neem ek fotos daarvan. Dit gaan soos haar portfolio van ondervinding wees. Dis voorbereiding vir haar toekoms en dit help my baie! Wen-wen situasie!



Sy leer haarself Spaans op Duolingo.

En een van haar doelwitte is om haar eie kookboek uit te bring! So sy soek resep idees en pas hulle aan en eksperimenteeer, en tik dan die resepteboek op Word. Dis als haar eie inisiatief.



Wat is missing? Wetenskap vakke en Biologie. Maar dis nie waar haar belangstelling lê nie. So ons los dit vir eers. Meskien kom dit later by. Of meskien raak sy nooit daaraan nie. Sy loop in ‘n rigting en ek is trots op haar!

1

Hy is Sterk in my Swakheid

Ek vind dat as ek te trots of oor selfversekerd van my eie vermoë raak, kom ek met ‘n harde slag aarde toe direk daarna!

Vanoggend wou ek spog op Bakkiesboek oor die wonderlike tyd wat ek Maandag met my kinders spandeer het. So lekker geTuisskool deur die oggend en dan het ek nog geswem met hulle die middag. Ek het so goed gevoel as mamma. Die mamma wat SO baie tyd met haar kinders spandeer en dit geniet! Ek sou vertel het van ons lekker baljaar in die swembad. Hoekom geniet kinders dit so baie om met Mamma of Pappa te speel? Al 5 my dogters het op my gehang en geskree in my ore. (Ek moes paar keer vra dat die een spesifieke een nie so in my oor moet gil nie.) Ons het bal gespeel en lekker gelag. Ek sou ‘n foto wou neem maar ‘n swembad is nou een plek waar selfies nie werk nie.

Die mooi aanhaling wat ek wou kwoteer was: Tyd wat jy met jou kinders speel, is nooit gemors nie. Aah, so poëties.

Wel, gelukkig het ek dit nie geplaas nie. Maar die skade was gedoen. My hart lê bloot voor die Here. Ek dog ek kry iets mooi reg. Mag mens goed voel oor wat jy regkry? Vir seker! Mag jy spog daaroor op sosiale media? Umm, ek sou nie ‘n reël wou maak nie. God ken elkeen se hart. Ek lief dit as mammas iets great deel sodat ons dit saam hulle kan vier. Dis baie belangrik!

Vandag het ek weer geswem met my kinders. By swemlesse. En die keer was die geskreu en trek aan my net te veel. My senuwees was klaar.

Oppad huis toe, sien ek my 4-jarige tweeling is moeg. Dit was 15h00 maar ek gee nie om nie, ‘n middagslapie sal almal goed doen. Ek speel Enja musiek. Ek shush die ander sussies. Die oë raak swaar en begin toe gaan. Hulle s’n, ek kyk vorentoe en in my truspieëltjie. Soos ons in die motorhuis trek, vlieg die oë weer oop. Julle ken daardie ding van kleinsus is stukkend moeg, maar sy wil niks uitmis nie. Ek probeer vir haar rustig maak en sê ek sal by haar bly in die kar, sy kan maar slaap. Nee, sy wil uit. Maar die kind weet nie waar sy is nie, sy is so moeg. Ek tel haar toe op en lê haar neer op my pragtige mooi dagbed. (Weereens dankie Denell🌷) Dit lyk of sy gaan slaap. Ek gaan trek my nat kostuum uit en is nog halfpad aan met droë klere toe ek kinders hoor swem! Ek hardloop venster toe en sien my moë jongste kind sit op die rand van die swembad met haar vlerkies aan. (Darem het n ousus haar swemvlerkies aangetrek.) Maar ek dag ek bars ‘n aar.  Ek skree vanuit die eerste verdieping venster: WIE HET VIR JULLE GESÊ JULLE MAG SWEM?!

My maggies! Hulle kom nou net van swemlesse af!! Hulle WEET hulle mag nie swem sonder toestemming nie. En boonop die kleintjie ook daar sonder dat iemand my sê. Ek roep dat almal dadelik moet uitklim. Maar of hulle hoor nie of my gesag is verdun as gevolg van die afstand. Hulle splash voort. Ek sug. Die fight is uit my uit.

Ek fantaseer oor alleen uitgaan vanaand. Meskien is die flieks weer oop? Of ek kan alleen sit by n koffie shop. Ek moet net wegkom.

Soms is dit lekker om heeldag by my kinders te wees. Ek dink dit vir al in die oggende as ek hulle gesiggies soen en ons hoef nêrens te gaan nie. Dis so lekker dat ek hulle stemmetjies en gesiggies enige tyd kan hoor. Luister na wat hulle dink. Ek hou daarvan. Hulle persoonlikheid leer ken. Ontdek wat vir elkeen belangrik is. Hoe like  hulle hulle broodjies. Daai een eet tamatie maar nie daai een nie. Sy het van tamatiesous gehou maar dis nou verby.

En dan werk ek daaraan om sekere dinge te verbeter. Minder skermtyd is tans my groot uitdaging. Ek weet van die euwels van te veel. Ek sien dit eerstehands! Die tantrums en bakleiery sodra die TV af is. Die ure se gelukkige popspeel as hulle niks skerms voor hulle gehad het nie.

Wat ek wil sê is, ek het tonne empatie en genade vir ma’s wat hulle kinders seermaak. Ek kom soms baie naby om my pragtige, dierbare, soeteliefies pynlik te lyf te gaan. En ek is ‘n taamlik psigiese gesonde persoon. Ek moet myself inhou. Op my foon gaan.  Chocolate gaan eet.’n Ander sussie vra om te kom help. Wegstap.

Ek, as gesonde, sielsgelukkige mamma, voel soms so kwaad! Wat nog van ‘n depressiewe, eensame, alleen enkelma van 3 of 4 kleintjies?

Waarom vertel ek julle my skandige gevoelens en optredes?

Oor die vers:

Ek huil voor die Here vanaand. Ek het Jou nodig Here. Enige woord van bemoediging vir die moë mamma? En die woorde kom:

Ek het jou lief.

Werp al julle bekommernisse op Hom, want Hy sorg vir julle.
1 PETRUS 5:7 AFR83
https://bible.com/bible/6/1pe.5.7.AFR83

Hy sal al die trane van hulle oë afdroog. Die dood sal daar nie meer wees nie. Ook leed, smart en pyn sal daar nie meer wees nie. Die dinge van vroeër het verbygegaan.”
DIE OPENBARING 21:4 AFR83
https://bible.com/bible/6/rev.21.4.AFR83

Moenie bang wees nie, Ek is by jou, moenie bekommerd wees nie, Ek is jou God. Ek versterk jou, Ek help jou, Ek hou jou vas, met my eie hand red Ek jou.
JESAJA 41:10 AFR83
https://bible.com/bible/6/isa.41.10.AFR83

0

BANG vir foute maak.

Vraag vanaf ‘n nuwe tuisskool mamma: “Hoe kry mens die bangheid uit n kind om foute te maak? As my kind een fout maak (bv. spelling), dan raak sy so bang, sy wil glad nie aangaan met die werk nie.”

My antwoord: My oudste het ook so gevoel toe ons eers begin tuisskool. Ek moes omtrent 6 maande lank fokus op die sin: ‘Dis okei om foute te maak.’ Ons het n studie gemaak daarvan. Ek het doelbewus vir my kind begin leer dat foute’ n gesonde deel van menswees is. Ek het die volgende gedoen:

  • Ons het gekyk na uitvindings wat ontaard het uit foute. Die boek gelees: Mistakes that Worked  Een prettige voorbeeld is die donut! Die gatjie het per ongeluk in ‘n vetkoek gevorm en kyk hoe word die donut wêreldwyd geniet! 🥯
  • Ons het ook geleer van Bybel karakters wat groot foute gemaak het maar God het hulle steeds gebruik.
  • Vir kopiewerk, het my dogter aanhalings van bekende mense oorgeskryf. Elke kwotasie sê jy kan nie leer sonder om foute te maak nie. Hier is die gratis pakket wat ek gebruik het: https://rockyourhomeschool.net/growth-mindset-copywork-mini-book/
  • ‘Growth Mindset’ is ‘n konsep wat ek oor geleer het toe ek die aanlyn kursus daaroor doen deur Coursera. Die artikels oor die verskil tussen’ Fixed Mindset’ teenoor ‘Growth Mindset’ het my gefassineer! Daar is ‘n manier van dink wat’ n reuse impak op ‘n persoon se lewe kan hê. Dit beïnvloed sukses in die werkplek asook die huwelik. Growth Mindset speel’ n belangrike rol in’ n persoon se persepsie van hulle vermoë en daarom hulle toekoms.
  • Veranderde denke begin by veranderde woorde. Ouers kan hulle kinders help om minder te stres oor hul foute deur om hulle manier van praat eers te verander. Hier is ‘n tabel vanaf Carol Dweck.

* Praat oor die foute wat jy gemaak het en hoe jy daaruit geleer het. Jou voorbeeld is dikwels die magtigste leermeester!

* Ek het vir ‘n ruk opgehou kruisies maak by my dogters se werk. Ek sou net’ n syfer onderstreep of niks merk nie want sy kon nie kruise hanteer nie. Ek het net die fout vir haar uitgewys en haar gehelp verstaan wat sy gemis het.

‘n Wyse tuisskool pappa vra sy kinders na elke dag: watter foute het jy gemaak vandag? En wat het jy daaruit geleer?

My dogter het na baie geduld en liefde en die aanhoudende fokus op foute as ‘n geleentheid vir groei, ‘n nuwe sienswyse aangeleer. Ek is verstom oor hoe kalm sy nou is oor foute en hoeveel keer sy sal aanhou probeer.

Nog hulpbronne:

FANTASTIC FAILURES : True Stories of People who changed the world by falling down. https://ebookreader.digital/Fantastic%20Failures%20True%20Stories%20of%20People%20Who%20Changed%20the%20World%20by%20Falling%20Down%20First

The Ultimate list of free Growth Mindset Printables https://bitsofpositivity.com/the-ultimate-list-of-free-growth-mindset-printables-for-kids-and-adults/

https://fs.blog/2015/03/carol-dweck-mindset/
0

Leefstyl van Leer

Nóg ‘n kopskuif wat nuwe tuisskolers moet maak is die een van skooltyd tot leefstyl van leer.

Oor die algemeen, gebeur skool tussen 7:30 en 14h00. Dit is waar die leer plaasvind. In die skoolgebou. Huiswerk is blykbaar hersiening, (alhoewel ek weet dit al hoe meer nuwe werk en projekte is wat ouers hulle kinders mee help).

Dus, wanneer ouers begin tuisskool, soek hulle die skedule, die tydstip wanneer watse leerarea aan gewerk gaan word. Hulle vra my: “wat moet my kinders weet?” En “op watter ouderdom moet hy/sy kan…” vul in die res.

Die Departement van Onderwys het ‘n volledige, ingewikkelde Uitkoms tabel vir elke graad. Die jaar se temas en werk wat elke graad moet dek is als daar vir enige ouer om te gaan opswot. Die weke en dae, selfs tydstip wat aan lees en praat en skryf gegee moet word is daar. Hier is die skakel https://www.education.gov.za/Curriculum/CurriculumAssessmentPolicyStatements(CAPS).aspx

Maar wanneer jy begin tuisskool, is jy meeste van die dag, week, maand en jaar saam met jou kinders. Daar hoef nie spesifieke ure van die dag uitgeknip te word vir leer nie. Dit werk natuurlik lekker om roetiene te handhaaf en ietsie van ‘n plan te hê. Maar jy gaan sien die ‘skooldag’ is korter as die hoofstroom skole s’n, of konstant ~ hang af hoe jy daarna kyk.

Dis omdat leer die heeltyd plaasvind. En jy kan jouself instel daartoe. Baie leer vind plaas in ons kar. Ek vertel Bybelstories en die kinders luister graag. Ek vertel wat ek geleer het uit my kinderdae. Foute en lesse. Embarrassing moments, dan lag ons saam. Ons ry verby ‘n Engen petrol trok die ander dag soos hy petrol in die massiewe houers onder die grond by die petrolstasie ingooi. Ek wys die kinders gou in die verbygaan. Hulle is verbaas, het nie dit geweet nie!

Ons bespreek baie keer voëls. My jongste is mal oor voëltjies. Sy wil graag hulle uitwys vir my en dan vra sy die name. Soms ken ek die voël. Gewoonlik nie. Dan trek ons die voëlboek nader.

Ons hoor die geroep van ‘n Visarend en dan soek ons hom en voel verheug as ons drie sien sweef hoog in die lug. Hoe en hoekom sweef sekere voëls? Daar volg’ n bespreking en almal deel die kennis wat hulle het.

Gister by die danslesse, sien ons hoe eet Grys Loeries aan ‘n appel. Daars twee, so ons neem aan een is die wyfie en een die mannetjie. My dogter neem my foon en loop stilletjies nader om’ n foto te neem. Hoe het ek geweet dis Loeries? Toe ons kinders was, was my broers deel van ‘n orkes met die naam ‘Die Loeries’. Hulle het hemde en boeke met die prentjie van ‘n Loerie op. Ons het oppad na hulle blokfluit lesse, Loeries gesien in die omgewing en so het ek geleer hoe lyk die voëls. Maar ek het dubbel seker gemaak met Google dat hierdie wel Grys Loeries was. Daars ook helder groenes so kyk uit vir hulle!

Ilani se foto van ‘n Grys Loerie.

Met goeie toeps kan mens baie leer in die verbygaan. Of opsetlik. Ek soek nog `n goeie een om plante te identifiseer. Die Plant app wat ek gehad het erken net Amerikaanse plante. Maar mens kry die wat jy die plant afneem wat jy oor wonder en dan kom die naam op! Hoe cool is dit?!

Mens kan klasieke musiek luister in die kar of by die huis. Soos Beethoven of Chopin se bekende simfonieë opkom, kan julle gesels oor die komponis. Google as jy nie weet nie.

Ek lees vir my kinders baie stories en dit lei na die wonderlikste gesprekke! Voorlees is so ongelooflik vindingryk! Tog voel dit so passief. So min. Ons glo daar moet bladsye werk wees, wit op swart geskryf, om as leer te kwalifiseer. Dis hoekom daar so min tyd is vir speel of swaai of net dagdroom. Want dit lyk te lui om as skoolwerk te tel.

‘n Leefstyl van leer beteken jy (en jou kinders) kan enige tyd en enige plek iets leer. Ek deel die foto met toestemming. Pappa Jannes sê die perd staan vir ure stil terwyl sy ruiter so sit en lees. Wat ‘n salige prentjie om my punt te bewys!

As mens oop is om te leer, enige tyd, enige plek, leer jy baie en aanhoudend. Soos ‘n spons, slurp jy kennis op orals waar jy gaan. Met vakansie. Op uitstappies. By die winkels. In die kar.

Ons het gaan stap in’ n kwekery die week. My kinders besef mens kan jou eie waterval bou met kunsklippe. Hulle hoor ‘n papegaai en besef dit maak seker nie die stilste troeteldiere nie. Ons kom agter hoe duur hout trellis is en wonder of ons een kan bou uit kratte. 🤔

Blootstelling: een van die groot voorregte om in ons land te woon, is om baie geleenthede te hê vir leer ervarings. Mens kan bessies of aarbeie pluk. Skapies en plaasdiere by plase of opstalle besoek. Antieke by teetuine of markdae of museums aanskou. Koeie melk by melkerye. Wetenskap vertonings sien by universiteite. In grotte loop en berge opklim. Selfs die armoede om ons skep geleentheid vir leer. Nie almal in die wêreld weet van plakkerskampe of straat entrepreneurs nie. Ons kinders word geïnspireer om geld te maak sodat hulle kan gee aan die wie dit nodigste het.

Ek onthou nou van die trip na die hospice die ander dag. Ek het my dogters geneem opsoek na tweedehandse boeke want die biblioteek is nog toe. Daar sien ons allerhande outydse ditjies en datjies. Kantoor fone is reeds vir my kinders vreemd en antiek! Gramafoon plate en kasette! Daar was projeksie masjien en skyfies vir skyfievertoning. Dit was ‘n les in geskiedenis terwyl ons snuffel deur die rakke.

Wat het jy nodig om jou denke tot een van ‘n Leefstyl van Leer te verander?

~ nuuskierigheid

~ oop oë, oop kop

~ jou slimfoon gereed om te soek vir antwoorde.

En ‘n bereidwilligheid om te leer!

0

As jou dag nie gaan soos jy beplan het nie…

Gister was die loodgieters hier om vir ons ‘n nuwe geyser te installeer. Die ou een het gebars. Ons het bietjie wiskunde tussendeur gedoen. Ek het geweet dit gaan chaos wees. So, daar was reeds genade vir myself oor die ongewone dag.

Maar vandag was daar geen onderbrekings nie. Ons het niks aan nie. Hoef nêrens te gaan nie. Niemand kom kuier nie. Die ideale dag om baie werk gedoen te kry! En het ons? Nee! Ek is nie tevrede met hoe vandag se tuisskool verloop het nie. Hierdie is ‘n joernaal inskrywing om vas te stel wat verkeerd gegaan het en hoe ek dit kan regmaak.

1. Liaseer werk. Orals lê papiere. Papiere van laas week se skryf oefening en Wiskunde werkkaarte en prentjies wat hul geteken het. Ek wil hê my kinders moet leer om hulle werk self te bêre. Ek het gesê dat dit nie moontlik is vir my om almal se werk heeltyd in hul lêrs te bêre nie. Ons moet aanhou liaseer sodat daar rekord is van hulle werk. Hulle sê toe dat hulle nie weet watse lêr is hulle s’n nie. Ek handig toe almal se lêre uit. Dink hulle bêre toe hulle papiere. 🙄

2. Wiskunde. Janéy het 3 breuke werkkaarte gedoen terwyl ek langs haar gesit het. Netjiese werk. 👍 Ilani het 2 lang deel somme gedoen op haar eie. Daar was nog 3 op die bladsy. Net 2 somme! Dis te min! Hulle was wel reg gewees. Sy verstaan die lang deel darem. Hoe kan ek kry dat sy die bladsy voltooi? Sy werk so stadig. Ek weet sy moet net fokus. Dalk haar uitdaag om dit binne 10 minute klaar te doen? Horlosie by haar sit. En kyk of dit help.

Tenike het 4 wiskunde werkkaarte gedoen op haar eie. Laaste een het sy meestal als verkeerd gekry. 🙈 Maar sy wou nie korreksies doen nie. Sy wou haar breek neem, toe sê ek okay.  Ander werkkaarte het sy mooi gedoen en verstaan. Meskien was 4 te veel. As sy moeg raak, maak sy meer foute. Maar sy klink altyd so gretig, dat ek wil aanhou werk gee. Bak brood terwyl die oond warm is! Maar die foute is ‘n demper op haar entoesiasme. Meskien moet ek haar stop. Ek kan sê sy het pragtig gewerk en dis genoeg wiskunde vir die dag.

4. Lees: Net Tenike het vir my vandag gelees. Sy lief om vir my te lees! Ek het Ilani oor en oor geroep! Hoekom het sy nie vir my gelees nie? Haar leesboek lê op haar lessenaar. Dis Z vir Zackie boek. So een wat sy geniet en lekker kan lees… O wag, sy HET vir my gelees! Twee bladsye. Hoekom vergeet ek dit? Ek was op my foon gewees 🙈 Ai! Hoekom het sy so min gelees? Iets het ons onderbreek… Sy hou daarvan om my volle aandag te hê. Ek moet more meer fokus en luister terwyl sy lees.

Janéy wil iets vir my op Rivet lees. Onthou om more haar te herhinner. Sy kan ook die Tower Ponies vir my lees.

5. Toe het Ilani en Janéy ander planne. Ilani wou ‘n video opneem van Romeinse syfers. Sy het toe. Dit was baie mooi verduidelik. In Engels. Dis werk wat sy ken so sy leer dan niks nuut nie. 🤔 Wel mooi gepraat. Soos’ n 6 minute mondeling. Mmm, dis dan nie te sleg nie.

Janéy wou ‘n toneelstuk skryf. Sy het in Engels begin, maar toe sê ek sy moet in Afrikaans skryf. Toe vee sy haar Engelse opskrif uit en dink verder aan gaar storie. Toe ek weer kyk het sy niks geskryf nie. So, ek roep haar om Afrikaans se IGSCE werk te doen. Haar eerste op die vlak ooit. Sy het baie netjies geskryf. Ek moes baie help om die vrae te verduidelik en basies die antwoord vir haar gegee. Ja, ek het seker elke vraag vir haar geantwoord. Eish! Maar sy het nog nooit sulke vrae gesien nie. Begripstoets. Ek het verduidelik van vol sinne antwoord. Toe was sy baie versigtig om elke keer ‘n vol sin te skryf. Dis ver van klaar. Ons moet more daarmee aangaan. Hoe kan ek minder die antwoord gee en meer laat sy self dink? Dalk dink ek te min van haar vermoë. Sou sy die antwoord kon uitpluis? Ek wonder 🤔 Sal more laat sy self lees en antwoord. Kyk of sy kan.

My tweeling het mooi gespeel en prentjies ingekleur. Bietjie op my Reading Eggs app gespeel.

Dis nou 26 Augustus 2020. Die dag na gister se inskrywing. Die dag wat ek gehoop het gaan beter gaan. Maar ai, dit was erger! Ek het op die kinders geskree! My geduld was net te ver gestoot. Toe kook ek oor! 🙈 En dan moet ek huilende kinders troos.

Ilani het skielik gesukkel met die lang deel wat sy gister kon regkry! Ek kon dit nie verstaan nie. Sy vra my iets wat sy gister verstaan het! Ek het dit verloor! Die horlosie langs haar het net aanhou tiek terwyl sy bo in haar kamer gaan huil het. As julle gedink het dit gaan altyd klopdisselboom by ons, nou weet jy, dit doen nie.

En Janéy sukkel so met die breuke werk. Ek sê ons kan dit los en aangaan met ander wiskunde maar sy wil nie bladsye oorslaan nie. Sy wil sistematies deur die wiskunde boek werk. So, ons sukkel deur nog werk waar ek basies vir haar stap vir stap sê wat om te doen. Sy sê sy hoor die woorde wat ek sê maar sy verstaan nie hoekom sy moet doen wat sy doen nie. En hierdie is werk wat ek met Lego en magnete en tabelle wat sy vashou vir haar verduidelik het. Toe vra ek wat wil sy hê moet ek doen. Sy antwoord: “Wag tot ek gereed is. Tot ek dit verstaan.” En watse wiskunde doen ons tot dan, wonder ek.

En my 4-jarige Nivea het getantrum en gehuil. Sy wil hê haar tweeling sussie moet die Pappa wees maar Michaela weier. Nivea sê vir ons almal wat om te doen. Tot waar ek moet parkeer! Of waar ek haar kos moet neersit. En met watse lepel sy wil eet. So as haar sussie nie die Pappa rol wil speel nie, voel ek sy hoef nie. Maar Nivea hou nie op skree daaroor nie. So ek gee haar pak en plak haar neer op ‘n stoel in die badkamer. En maak die deur toe! Om die aanhoudende geskreeu bietjie uit te blok. Totdat my lankmoedige bediende Brenda, haar gaan haal en probeer troos. My hart versag en ek gaan gee haar n drukkie en hoor hoe kan ek help. Sy huil toe oor iets heeltemal anders. En ek kon dit beter maak.

Die einste Nivea kom later na waar ek met Janéy deur haar Afrikaans stoei. Sy bring vir my twee blommetjies. Sy sê as die een dood gaan, is daar nog een vir my. My hart smelt! Ek neem haar op my skoot en vra of sy jammer sê. Sy sê ja. Ek gee haar ‘n drukkie en sy hou my net vas. Ek sê dat dit aaklig was om met haar te raas en in die badkamer toe te maak. Sy sê dat sy gedink het dat ek die deur gesluit het en sy nooit sou kon uitkom nie! ☹️😭 Arme liefie! Ons neem toe die fotos saam en ek verseker haar van my liefde.

Ek is altyd die een wat ander mammas bemoedig om kinders nie te push nie. Ek gee gereeld raad om terug te staan en net boek te lees of asem te skep en die werk te los vir ‘n ander dag. Maar ek neem nie my eie raad nie! Ek wil sekere werk gedoen hê die week. Ek voel ons gaan later vakansie hou en rus en speel. Ek stoot nog my agenda op die kinders en dit het vandag lelik ge’backfire’.

Ek werk nou aan my Home Education Diploma deur The Centre of Excellence. Dis gratis beskikbaar die jaar. Dis ‘n uitstekende aanlyn kursus! Nou lees ek die woorde op my rekenaar skerm: “Eventually, even a child only learning what they want to learn will learn how to add, subtract, multiply and divide by a reasonable age. They will understand fractions, decimals, percentages and ratios through everyday life and practical problems. It doesn’t have to be forced, and in fact, you can’t force someone to learn something. In order for them to really understand it, they have to want to learn it.

My kinders speel nou so lekker met die buurkinders. Al die stoei en huil en druk van die oggend is, gelukkig, vergete. Ek sien uit om elkeen ‘n druk te gee en jammer te sê. Darem kry ons elke dag’ n nuwe kans.

0

Beatrix Potter verjaar!

28 Julie 1866 was Helen Beatrix Potter gebore in London, Engeland. Ek het nota gemaak hiervan ‘n paar jaar gelede en vier haar verjaarsdag nou elke jaar.

Hoekom? Want dis ‘n goeie manier om oor ‘n skrywer te leer! Julle wat my’ n rukkie al volg sal weet ons hou Dr Seuss partytjies op die 2de Maart en Winnie the Pooh se skrywer, A. A. Milne verjaar in Januarie. Die verjaarsdag skep die geleentheid om boeke te lees en oor skrywers se lewens te leer. En, lekkerste van als, saam ander tuisskolers te kuier!

Lockdown level 3 het ons nie gekeer om vandag so paar mammas en dogters te nooi vir ‘n gesellige Beatrix Potter dag! Ons eie klein privaat skool. 😜

Al die mammas het soveel moeite gedoen met die eetgoed! Kyk hoe mooi het ons tafel gelyk! Dankie aan die mammas wat dekor stukke gebring het soos koolkoppe en hasies en nessies en ‘n krat wat so goed gelyk het!

Groente is natuurlik ‘n groot tema in die Peter Rabbit storie. Die gulsige haas is heeltyd opsoek na sappige groente in Mr McGregor se tuin!
My Michaela liefie.
Ek het jellie gemaak en gevriesde ertjies in gegooi net vir die pret daarvan. En in die voorgrond is wortelkoekies. 😄

Nadat almal lekker geeet het aan wortel muffins en gesonde happies het ek vertel van Beatrix Potter. Ek het oor haar opgelees en interessante feite gedeel.

Ek soek vir baie van my fotos en hulpbronne op Pinterest. Ek het ‘n’ board’ daar getitel Beatrix Potter sou julle my wou volg.

Toe lees ek die storie van Mrs Tiggy-Winkle terwyl die meisies luister vir werkwoorde. Een mamma skryf toe die werkwoorde neer op papier. Ek stop soms terwyl ek lees en vra of hulle weet wat beteken die woord of daai woord. Dit was vir my kosbaar hoe ons die storie terdeë geniet het! Net soos Beatrix dit bedoel het.

Toe speel ons Stomstreke! Daardie werkwoorde was in ‘n mandjie gegooi en toe trek die kinders een uit en wys ons deur toneelspel wat die woord is. Selfs my tweeling wou’ n beurt hê!

Toe was dit tyd vir verf of teken! Een mamma het opgemerk hoe stil was die kamer vol girls want almal konsentreer so hard. 😍

Die inspirasie was opgesit vir almal om na te maak.

Toe was dit tyd vir groentesap kelkies kompetisie! Ek het drie sappe by Fruit en Veg gekoop en toe daag ek die meisies uit om te sien wie drink al drie soorte die vinnigste! Wortel sap, beet sap en groen groente sap! 😛 Die girls het twee-twee teen mekaar kompeteer en dit was so snaaks en groot pret! En boonop baie gesond!

Hier is skakels na bronne indien julle die sappige tema jul eenheid studie wil maak.

https://www.123homeschool4me.com/free-tale-of-peter-rabbit-printables_62

https://www.reallifeathome.com/free-beatrix-potter-printables/

https://etc.usf.edu/lit2go/148/peter-rabbit-and-other-stories/4923/the-tale-of-peter-rabbit/

https://youtu.be/wtWWxw05Rzk

My dogter Ilani (10) se Jemima Puddleduck.
My 5 wou aantrek vir die tema: Janéy (heel regs) is Mrs Tiggy-Winkle, Ilani (heel links) is Jemima Puddleduck en Tenike is Mrs Rabbit met my tweeling as haar hasies Flopsy en Mopsy.

Wat ‘n goeie dag! My hart is vol dankbaarheid, my sosiale beker weer vol en my maag, soos Peter Rabbit s’n, trommeldik geeet!